Saturday, 2 April 2016

කූල් කරපු ගුරාමි - පවර් කට් කතාවක්...!


දැන් මේ විනාඩි දහයකට කරන්ට් කපලා අපේ කට්ටිය මැරෙන්න හැදුවත් මට මතකයි ඉස්සර අපි පොඩි කාලේ දවසට පැය දෙකක් කරන්ට් කපනවා. ඒ චන්ද්‍රිකා ගේ ආණ්ඩුව කාලේ. රෑ 8 ඉදන් 10 වෙනකම් කරන්ට් නෑ. අපි ඉතින්  ලාම්පු එළියෙන් හරි ඉටි පන්දන් එළියෙන් හරි තමයි ඒ පැය දෙකේ කාලය ගත කළේ. ඇත්තටම ඒ කලුවරේ  ලාම්පු එළියෙන් ගත කරපු පැය ගාණ හරිම සුන්දරයි. මමයි මල්ලියි බ්‍රිසිල් බෝඩ් එකක දාම් කොටුවක් ඇඳගෙන පාට දෙකක ටොනික් පියන් අරගෙන දාම් අදිනවා. ඒ කාලේ ෆෝන් ලැප් ටොප් ඔය ජංගම හිර කූඩු තිබුණේ නෑනේ. අම්මලට නම් කරන්ට් කපපු එකෙන් වුණේ අර හැම දාම බලන ටෙලි නාට්‍ය ටික බලාගන්න බැරි වුණ එක විතරයි. ඒ ඇරෙන්න අපිට නම් ඒකෙන් වුණ ලොකූ බලපෑමක් තිබ්බේ නෑ. 

දැන් මේ හුරතලේට ආදරේට බල්ලෝ පූසෝ ඇති කළාට ඉස්සර අපේ ගෙදර තිබ්බෙ ලොකු මාලු ටැංකියක් විතරයි. ඕකේ එක එක ජාතියේ මාලු හිටියා, පාට පාට එවුන්. මමයි මල්ලියි හුඟාක්ම කරන්ට් කැපුවම දාම් අඳින්නේ ගෙදර ඉස්තෝප්පුවේ මාලු ටැංකිය ළඟ. මාලු ටැංකිය තිබුණේ ලොකු ලී මේසයක් උඩ. සාමාන්‍ය හතරැස් මේසයක්... ඒකටම හයි වෙන්න වීදුරු ටැංකිය හයි කරලා, ගෙදරක වහලක් වගේ ටැංකියට උඩින් පොඩි ලී වහලක් හයි කරලා තිබ්බේ. උන්ට කෑම දාන්න ඉඩ තියෙන්න ඒ වහල ටිකක් ටැංකියට අඟල් හයක් විතර උඩට වෙන්න මේසයේ හතර කොනේ හිල් හතරක් විදලා හයිකරපු ආධාරකයකින් රඳවලා තිබ්බේ. අර මාලු ටැංකිය තියෙන මේසයේ දෙකෙලවරේ ඉටි වක් කරලා අපි ඉටි පන්දම ඒ ඉටි ගොඩේ රඳවනවා. ඉටි පන්දම් එළියෙන් ටැංකියේ මාලුන්ව එහෙම හරි අමුතු ලස්සනකට පේනවා. 

ඔය ටැංකියේ හිටියා තැඹිලි පාට ගෝල්ඩ් ෆිශ් ජෝඩුවක්. මේ දෙන්නා අපි දවල්ට හවසට බලන ඕනම වෙලාවක දකින්නේ එක ගෝල්ඩ් ෆිශ් මාලුවෙක් හයියෙන් ඉස්සරහින් පීනනකොට අනිකා ඒ පස්සේ එළවනවා. ඉතින් මාලුන්ගේ පිරිමි සත්තු ගෑණු සත්තු හොයන්න දන්නේ නැති නිසා මමම තීරණය කෙරුවා ඒ ඉස්සරහින් හයියෙන් පීනන් යන්නේ ගෑණු සතා වෙන්න ඇති, පිරිමි සතා ඒ පස්සේ යනවා වෙන්න ඇති කියලා. මිනිස්සුන්ගේ ලෝකේ වෙන සමහර දේවල් සත්තුන්ගේ ලෝකෙත් ඒ විදිහටම වෙනවනේ... ඒකයි. ඉතින් අනිත් මාලු ටික කලුවරේ සිල් රකිනකොට අර දෙන්නට නම් පුදුම දාංගලයක් තියෙන්නේ. වෙලාවකට මේ දෙන්නගේ ආදර රැඟුම් වැඩි කමට වතුර ටික 'ජබොක් ජබොක් ' ගාන සද්දෙත් ඇහෙනවා. හරියට වතුරට  තිරිවානා ගල් වැටෙනවා වගේ. ඉතින් එහෙම මේ ජෝඩුව නටනකොට ටැංකියෙන් පිටතට වතුර  වීසි වෙලා ඉටි පන්දම පවා නිවෙනවා... පස්සේ අනික් ඉටි පන්දමෙන් ටැංකිය ඇතුළ බලනකොට ජෝඩුව මුකුත් නොවුන ගාණට ඉන්නවා. ටැංකියේ හැම ජාතියේම මාලු වර්ග හිටියා,ගෝල්ඩ් ෆිශ් , ටැංකි සුද්දෙක්, සාරි ගප්පියෝ තව පොඩි පොඩි පාට පාට ගේ පිටිපස්සෙ වෙලෙන් අල්ලන් ආව මාලු පැට්ව් වලින් මාලු ටැංකිය ලස්සන වුණා.

ඉතින් එදත් වෙනදා වගේම රෑ 8 වෙනකොට කරන්ට් කැපුවා. අපි පැය භාගයකට විතර පස්සේ සුපුරුදු විදියටම අර බ්‍රිසිල් බෝඩ් එකේ හදාගත්ත දාම් බෝඩ් එකේ දාම් අදින්න පටන් ගත්තා. 
ටික වෙලාවකින් අම්මා තාත්තාට කෝල් එකක් ගන්නවා වගේ ඇහුණා..

'මේ ඒයී හෙට උදේට උයන්න මොනවා හරි එනකොට ගේනවද? ගෙදර හරියේ මාලුත් මුකුත් නෑ.'

අම්මා තාත්තා එක්ක කතාවෙන් පස්සේ කෙළින්ම ආවේ අපි දාම් අදින තැනට. සද්දයක් බද්දයක් නැතිව අහක බලන්නෙ නැතිව දාම් අදින්නේ බෝඩ් එක ඇතුළටම බැහැගෙන. මොකද අහක බැලුවොත් මල්ලි හොර කරන්න බැරි නෑ. කීප වතාවක්ම එහෙම වෙලත් තියෙනවනෙ. ඉතින් අන්තිමට වෙන්නේ රණ්ඩුවකින් සෙල්ලම ඉවර වෙන එක.

'ඉටි පන්දම් ඉවරයි තව වෙලා යලි වගේ කරන්‍ට් එක එන්න මම මෙතන කඩේට ගිහින් එන්නම් ඉටි පන්දම් අරන් දෙන්නා රණ්ඩු වෙන්නේ නෑ ඕන්.'

අම්මා එහෙම කියාගෙන කඩේට යන්න එළියට බැස්සා. අම්මා යනවාත් සමඟම ගේ අයිනේ අන්දර වැට අයිනේ බයික් එකක් නවත්වනවා වගේ සද්දයක් ඇහුණත් ඒක ඒ හැටි ගණන් ගත්තේ නෑ මොකද දාම් අත බලන්න එපැයි... මල්ලි හොර කළොත්...

'ගෙදර කවුද?'

අපේ ගෙදරට කවුදෝ ඇවිත්. මේ කට්ට කලුවරේ කවුද මේ ඇවිත් ඉන්නේ? මාලු ටැංකියේ මේස කොනේ ගහලා තිබ්බ ඉටි පන්දම අරගන මම  ඉස්තෝප්පුවේ දොර පැත්තට හැරුණා...

'මල්ලි එනවකෝ ටිකක් කවුද  ඇවිල්ලා ඉන්නේ කියලා බලන්න.?'

'මට බෑ '

ඇත්තටම බයක් නිසා නෙවෙයි මල්ලිට කතා කලේ. මම එහෙට මෙහෙට යනකම් ඉදලා මෙයා ටොනික් ඉත්තෝ ටික එහෙට මෙහෙට කරන්න බැරි නෑනේ... එයාට ඕනා හැමදාම දිනන්න. ඒවා කොහෙද මා එක්ක... මෙහෙම ළතැවෙවි ඉන්නකොට අර බයික් එකේ ආව මනුස්සයා ගේ දොර ළඟටම ආවා. මොකක්ද පාර්ස්ලයක් අතේ තියෙනවා දැක්කා ඉටි පන්දම් එළියට. හැබැයි මූණ නම් පැහැදිලි නෑ. කොහොම වුණත් මීට කලින් නම් දැකලා තිබුණ නැති මූණක්.

'පුතා මේ ශාන්ත රාළහාමිලාගේ ගෙදර නේද?'

'ඔව් මෙහේ තමයි'

'අහ් මෙන්න මේ මාලු ටික තාත්තා දෙන්න කිව්වා පුතා.'

කහ පාටට හුරු තරමක් උස ප්ලාස්ටික් අයිස් ක්‍රීම් පෙට්ටියක් පොලිතින් බෑග් එහෙකට දාලා. ලා අඳුරේ වුණත් කහ පාටට මම ඒ පාර්සලේ දැක්කා. ටිකක් විතර බරයි.  

'තාත්තා හෙට උයන්න මාලු එවලා වෙන්නැති'

මම එහෙම හිතාගෙන පාර්සලේම ෆ්‍රිජ් එකේ ඩීප්ෆ්‍රීෂර් එකේ දැම්මා. ඊට පස්සේ ආයෙමත් දුවලා ගියේ දාම් අදින තැනට. මේ  විනාඩියටත් මෑන් ටොනික් ඉත්තෝ එහේ මෙහේ කරලා  ගේම් එක එයාගේ වාසියට හරවන් කියලා මට දැනිලා තිබ්බේ... ඒත් මම දෙන්නම්කෝ වැඩේ කියලා හිතාගෙන ආයේ ගේම් එකට බැස්සා...ටික වෙලාවකින් ඉටි පන්දමුත් අරන් අම්මත් ගෙට ගොඩ වුණා. විනාඩි 15කට විතර පස්සේ සෙල්ලම ලෙල්ලම් වීගෙන එනවා... 

අම්මා සැර කරපු නිසා ටිකක් කරබාගෙන හිටියා...

'හොරා  හැම්දාම හොර කරලා දිනන්නේ...'

මම ආයේ පටන් ගන්නකොට , අම්මා කට වහගන්න කියලා ටිකක් තදින් කිව්ව නිසා ආයෙමත් සද්ද නැතිව හිටියා.  කරන්ට් එක නම් දැන් එන්නට වෙලා. නමුත් පරක්කුයි. හදිස්සියේම අර අංකල් ගෙනත් දුන්නු මාලු පාර්සලේ මතක් වුනානෙ මට.

'අහ් අම්මේ.... කවුද අංකල් කෙනෙක් ඇවිත් මාලු  ගෙනත් දීලා ගියා තාත්තා දෙන්න කිව්වා කියලා... මම ඒක ෆ්‍රිජ් එකේ දැම්මා.'

මම එහෙම කියනවාත් එක්කම අම්මා ෆ්‍රිජ් එකේ දොර අරින සද්දය ඇහුණා. ඒ එක්කම අම්මාගේ හඬ තරමක් උස් හඬින් ඇහුණා...

'අයියෝ මේ වගේ ගොන් ගහක්...! මොළයක් කියලා එකක් නැත්තටම නැද්ද  කෙල්ලේ...! '

මම කුස්සියට දිව්වේ මං කරලායි කියන ගොන් වැඩේ බලාගන්න. ඒත් මට වඩා උනන්දුවෙන් දුවන් ආවේ මල්ලි.

'ඇයි මොකද වෙලා තියෙන්නේ...?'

'ඇයි මෝඩියේ... මේක ප්‍රිජ් එකට දාන්න කලින් ඇරල බැළුවෙ නැද්ද? මෙව්වා උයන්න එවපු මාළු නෙවෙයි. තාත්තා එවලා තියෙන්නේ ටැංකියට දාන්න මාළු දෙන්නෙක්....'

'මොකක්?... කෝ බලන්න...?'

'අයියෝ.... ගුරාමි පැටව් දෙන්නෙක් නේ ද?'

මල්ලි කියද්දි මමත් එබිලා බැලුවා.... ඔව් නේන්නම් ගුරාමි පැටව් දෙන්නෙක්... ඇයි යකඩෝ මම මේක නිකමටවත් ඇරලා බැලුවෙ නැත්තෙ? මුන් දෙන්නා මැරුණා නම්...? ඒ වෙද්දිත් භාජනේ ටිකක් කූල් වෙලා තිබ්බේ... විනාඩි විස්සක් විතර මුන් දෙන්නා මේක ඇතුලේ නොමැරී හිටිය එකම මදැයි... මම ඉක්මනට උන් දෙන්නාව ගෙනියලා ටැංකියට දැම්මා. මල්ලිගේ නෝන්ඩි කිරිල්ලේ නම් ඉවරයක් තිබුණේ නෑ...

අර ගුරාමි පැටව්‍ දෙන්නාට මොනවා නම් හිතෙන්න ඇද්ද? ‍වෙලාවට එදා එවෙලේ කරන්ට් කපලා තිබුණේ....!

14 comments:

  1. අනේ අම්මේ මේ වගේ පණ්ඩිතයෙක්...

    -----------------

    අර ලයිට් කපපු කාලේ නම් හරි ම සුන්දරයි කළු මොනරි යෝ..
    සිරසේ අර ගාමින්දගෙයි සුනෙත් ගෙයි රස කතා අහ අහ ගෙවිච්ච සොඳුරු පැය දෙකක් තමයි එක .
    දැන් අපි ලැප් වල සමාට් ෆෝන් වල හිරවෙලා නේ..

    ReplyDelete
    Replies
    1. හිතුවොත් දැන් වුනත් බැරි නෑ අපිට කූඩූ වලින් නිදහස් වෙන්න​ :)

      Delete
  2. Kalu Monari

    Thanks...another beautiful story.

    Never forget the troubles and the mental stress that we had during those "Power cutting time".

    Shame for the government which they cannot provide basic needs for public to live happily.

    ==Adrian Channa from Toronto===

    ReplyDelete
  3. ගුරාමියා කූල් එකේ චූන් එකේ ඉන්න ඇති

    ReplyDelete
    Replies
    1. චූන් වෙනවා කරන්ට් එක අැවිත් තිබ්බා නම්

      Delete
  4. මටත් එන්න සිද්ධ උනා.. හැක් ජය

    ReplyDelete
    Replies
    1. ගොඩ වුණ එක ගැන සන්තෝසයි

      Delete
    2. ගොඩ වුණ එක ගැන සන්තෝසයි

      Delete
  5. This comment has been removed by the author.

    ReplyDelete
  6. ගොඩ වුණ එක ගැන සන්තෝසයි

    ReplyDelete
  7. https://upekshad.blogspot.com/2014/08/blog-post_29.html

    ReplyDelete

ජිවිතය ගෙවෙන්නේ අන්න එහෙම, ------------------------------------------------- නුඹ..., දොඩම් යුෂ එක්ක කලවම් වුණ රතුම රතු වයින් වී...